کندھکوٹ (سید رشید احمد شاہ) کشمور پولیس نے جرائم پیشہ عناصر کے خلاف بڑی کارروائی کرتے ہوئے پولیس مقابلے کے بعد تین خطرناک ڈاکوؤں کو گرفتار کر لیا، جن میں سے دو زخمی حالت میں ہیں جبکہ دیگر ملزمان فرار ہونے میں کامیاب ہو گئے۔تفصیلات کے مطابق، ایس ایس پی کشمور محمد مراد گھانگھرو کی خصوصی ہدایات پر ضلع بھر میں جرائم پیشہ عناصر کے خلاف کارروائیاں جاری ہیں۔ اسی سلسلے میں تھانہ اے سیکشن کندھکوٹ کی حدود نئی روڈ نزد سبزی منڈی کے قریب انچارج مددگار خلیل لغاری اپنی ٹیم کے ہمراہ گشت پر تھے کہ انہوں نے مشکوک افراد کو ڈکیتی کی نیت سے کھڑا پایا پولیس کو دیکھتے ہی ملزمان نے فائرنگ شروع کر دی، جس پر پولیس نے فوری اور پیشہ ورانہ انداز میں جوابی کارروائی کی۔ فائرنگ کے تبادلے کے نتیجے میں تین ملزمان کو گرفتار کر لیا گیا، جن میں نوید احمد ولد شاہ محمد میرانی اور عامر ولد حاکم ملک زخمی حالت میں جبکہ ظہور ولد نور حسن ملک کو بغیر زخمی گرفتار کیا گیا۔پولیس کے مطابق گرفتار ملزمان شہر میں ہندو تاجروں سے ڈکیتی، اسٹریٹ کرائم، موٹر سائیکل چوری اور موبائل فون چھیننے سمیت متعدد سنگین وارداتوں میں ملوث رہے ہیں۔ ابتدائی تفتیش کے دوران انکشاف ہوا ہے کہ ملزمان نے حالیہ دنوں میں ارن کمار سے موبائل فون اور روہت کمار سے نقدی لوٹی، جس کی سی سی ٹی وی فوٹیج بھی موجود ہے۔ پولیس نے ملزمان کے قبضے سے بغیر لائسنس اسلحہ بھی برآمد کیا ہے جبکہ ان کے خلاف مختلف تھانوں میں متعدد مقدمات درج ہیں اور مزید کرمنل ریکارڈ کی جانچ جاری ہے۔زخمی ملزمان کو فوری طبی امداد کے لیے اسپتال منتقل کر دیا گیا ہے۔ کشمور پولیس کا کہنا ہے کہ عوام کے جان و مال کے تحفظ کے لیے جرائم پیشہ عناصر کے خلاف بلا امتیاز کارروائیاں جاری رہیں گی۔
