ڈپٹی ڈائریکٹر کالجز ڈاکٹر غلام عباس کا دورۂ چوآ سیدن شاہ، طالبات کے لیے کیرئیر رہنمائی کے نئے باب کا آغاز
پرنسپل ڈاکٹر عاصمہ شہزادی کی قیادت میں گورنمنٹ ایسوسی ایٹ کالج برائے خواتین میں کیرئیر کونسلنگ سینٹر کا افتتاح
چوآ سیدن شاہ (خاور شہزاد)
چوآ سیدن شاہ ڈپٹی ڈائریکٹر کالجز چکوال، ڈاکٹر غلام عباس نے گورنمنٹ ایسوسی ایٹ کالج برائے خواتین، چوآ سیدن شاہ کا باضابطہ دورہ کرتے ہوئے کیرئیر کونسلنگ سینٹر کا افتتاح کیا، جسے طالبات کی پیشہ ورانہ رہنمائی اور مستقبل کی بہتر منصوبہ بندی کی جانب ایک اہم پیش رفت قرار دیا جا رہا ہے۔ اس موقع پر انہوں نے طالبات سے تفصیلی ملاقات کی اور ایک جامع کونسلنگ سیشن کے ذریعے انہیں تعلیمی و عملی زندگی میں درست سمت کے انتخاب، جدید تقاضوں سے ہم آہنگ فیصلوں اور بااعتماد انداز میں کیریئر تشکیل دینے کے حوالے سے مؤثر رہنمائی فراہم کی۔ دورے کے دوران انہوں نے داخلہ ڈیسک کا بھی معائنہ کیا اور زیرِ داخلہ طالبات سے گفتگو کرتے ہوئے انہیں تعلیمی سفر کے مختلف امکانات سے آگاہ کیا۔ تقریب سے خطاب کرتے ہوئے ڈاکٹر غلام عباس نے کہا کہ نوجوان طالبات کو بروقت اور معیاری کیریئر گائیڈنس فراہم کرنا وقت کی اہم ضرورت ہے تاکہ وہ اپنی صلاحیتوں کو درست میدان میں بروئے کار لا سکیں۔ انہوں نے کالج کے مثبت تعلیمی ماحول کو سراہتے ہوئے پرنسپل ڈاکٹر عاصمہ شہزادی کی انتھک محنت، منظم قیادت اور ادارہ جاتی ترقی کے لیے ان کی مؤثر کاوشوں کو خراجِ تحسین پیش کیا۔ ان کا کہنا تھا کہ ڈاکٹر عاصمہ شہزادی کی قیادت میں یہ ادارہ نہ صرف تعلیمی میدان میں نمایاں مقام حاصل کر رہا ہے بلکہ طالبات کی ہمہ جہت شخصیت سازی میں بھی مؤثر کردار ادا کر رہا ہے۔ تقریب مجموعی طور پر طالبات کے لیے نہایت مفید، معلوماتی اور حوصلہ افزا ثابت ہوئی، جس نے ان کے تعلیمی اور پیشہ ورانہ مستقبل کے حوالے سے ایک نئی سوچ کو جنم دیا
