کھیوڑہ شہر ایک بار پھر ترقیاتی منصوبوں میں نظرانداز، منتظرعوامی حلقوں میں تشویش

ضلع کی بڑی آبادی اور سیاحتی اہمیت کے باوجود سیوریج کی صرف ایک سکیم، صاف پانی اور نکاسی آب کے سنگین مسائل حل طلب
پنڈ دادنخان ( سرفراز عباس)  حکومتِ پنجاب کے سالانہ ترقیاتی پروگرام 2026/27 میں کھیوڑہ شہر کو ایک بار پھر نظرانداز کیے جانے پر شہریوں اور سماجی حلقوں میں تشویش بڑھ گئی ہے۔ پروگرام میں سیوریج اور سینی ٹیشن کی صرف ایک سکیم شامل کیے جانے کو اہلِ علاقہ نے ناکافی قرار دیا ہے۔عوامی حلقوں کے مطابق اتنی بڑی آبادی اور تاریخی و سیاحتی اہمیت رکھنے والے شہر کے لیے ترقیاتی منصوبوں میں اس قدر محدود گنجائش زمینی حقائق کے برعکس ہے۔ شہریوں کا کہنا ہے کہ کھیوڑہ ضلع جہلم کا دوسرا بڑا شہر ہونے کے باوجود بنیادی انفراسٹرکچر کے مسائل مسلسل برقرار ہیں۔
سرکاری و مقامی سطح کے مطابق کھیوڑہ نہ صرف ایک قدیم شہر ہے بلکہ سیاحت کے حوالے سے بھی نمایاں حیثیت رکھتا ہے، تاہم اس کے باوجود ترقیاتی ترجیحات میں اس کی ضروری ضروریات کو مناسب توجہ نہیں مل رہی۔
عوامی حلقوں نے اس صورتحال پر تشویش کا اظہار کرتے ہوئے کہا ہے کہ صرف ایک سیوریج سکیم کی منظوری موجودہ مسائل کے حل کے لیے ناکافی ہے اور اس سے عوامی مشکلات میں کمی کے بجائے اضافہ ہو سکتا ہے۔کھیوڑہ کے مکینوں نے اس بات پر بھی افسوس ظاہر کیا ہے کہ مقامی سطح پر ترقیاتی دعوے اور سرگرمیاں زیادہ تر رسمی اقدامات اور فوٹو سیشن تک محدود نظر آتی ہیں، جبکہ عملی طور پر بنیادی ڈھانچے کی بہتری کے لیے مؤثر اور دیرپا اقدامات دکھائی نہیں دیتے۔
شہریوں کے مطابق شہر میں پینے کے صاف پانی کی فراہمی ایک سنگین اور دیرینہ مسئلہ ہے، جس کے باعث بڑی تعداد میں لوگ آج بھی محفوظ اور معیاری پانی جیسی بنیادی سہولت سے محروم ہیں۔ اسی طرح نکاسی آب اور سیوریج کا نظام بھی انتہائی غیر تسلی بخش حالت میں ہے، جس کی وجہ سے بارشوں کے دوران اور روزمرہ زندگی میں شہریوں کو شدید مشکلات کا سامنا کرنا پڑتا ہے۔عوامی  اور سماجی حلقوں نے ضلعی اور صوبائی انتظامیہ سے مطالبہ کیا ہے کہ کھیوڑہ شہر کے لیے ترقیاتی منصوبوں میں فوری اضافہ کیا جائے اور پانی، سیوریج اور نکاسی آب سمیت بنیادی سہولیات کے مستقل حل کے لیے مزید سکیمیں شامل کی جائیں۔