22 نمبر،ٹینچ بھاٹہ،رینج روڈ سمیت متعدد علاقوں میں آپریشن
سڑکوں اور فٹ پاتھوں سے سامان اٹھا کر اسٹور منتقل کر دیا گیا
راولپنڈی (عبدالرحمان سے) کینٹ بورڈ راولپنڈی کے شعبہ تجاوزات نے کارروائی کرتے ہوئے 22 نمبر، ٹینچ بھاٹہ، ڈھوک سیداں، پیپلز کالونی، مصریال روڈ، رینج روڈ، آلہ آباد، پشاور روڈ، نصیرآباد، ویسٹریج، حافظ آباد سمیت متعدد علاقوں میں فٹ پاتھوں اور سڑکوں پر قائم غیر قانونی تجاوزات ہٹا دیں۔ کارروائی کے دوران دوکانوں کے سامنے رکھا سامان، اسٹالز اور ریڑھیاں اٹھا کر کینٹ بورڈ اسٹور منتقل کر دی گئیں۔
حکام کے مطابق عوامی شکایات اور ٹریفک کے دباؤ میں اضافے کے باعث تجاوزات کے خلاف کارروائیاں تیز کی گئی ہیں۔ انہوں نے دکانداروں کو تنبیہ کی کہ دوبارہ تجاوزات قائم کرنے والوں کے خلاف سخت کارروائی عمل میں لائی جائے گی۔
