این اے 48 کے وفد کی خاقان وحید خواجہ سے ملاقات، نوجوانوں کے لیے مفت ڈیجیٹل کورسز کا اعلان
اسلام آباد (نمائندہ عوامی للکار) وفاقی دارالحکومت کے حلقہ این اے 48 کی یونین کونسل جھنگ سیداں کے معزز وفد نے چیئرمین خاقان وحید خواجہ سے اہم ملاقات کی، جس میں علاقائی مسائل، پارٹی تنظیم سازی اور راول فاؤنڈیشن کی ممبرشپ کے حوالے سے تفصیلی گفتگو کی گئی۔ وفد نے علاقے کو درپیش بنیادی سہولیات کی کمی، تعلیم و صحت کے مسائل اور نوجوانوں کے لیے روزگار کے مواقع کی قلت پر تحفظات کا اظہار کیا۔ اس موقع پر خاقان وحید خواجہ نے گفتگو کرتے ہوئے کہا کہ وہ گزشتہ اٹھارہ برس سے بلا تعطل عوامی خدمت میں مصروف ہیں اور ہمیشہ کوشش کی ہے کہ صحت و تعلیم کے شعبوں میں زیادہ سے زیادہ ریلیف فراہم کیا جائے۔ انہوں نے کہا کہ بدقسمتی سے وہ کام جو منتخب نمائندوں کی ذمہ داری تھی، وہ انہیں خود ادا کرنا پڑ رہا ہے، تاہم وہ عوام کے اعتماد کو کبھی ٹھیس نہیں پہنچنے دیں گے۔ انہوں نے اس عزم کا اظہار کیا کہ وہ ہر مشکل گھڑی میں عوام کے ساتھ کھڑے رہیں گے اور حلقے کی محرومیوں کے خاتمے کے لیے عملی اقدامات جاری رکھیں گے۔ چیئرمین پی اے کیو پی نے نوجوانوں کو راول فاؤنڈیشن کا حصہ بننے کی دعوت دیتے ہوئے اعلان کیا کہ انہیں مفت ڈیجیٹل مارکیٹنگ اور ای کامرس کی تربیت فراہم کی جائے گی تاکہ وہ باعزت روزگار حاصل کر کے معاشی طور پر خودمختار بن سکیں۔ انہوں نے مزید کہا کہ عوامی شمولیت کے بغیر ترقی ممکن نہیں، لہٰذا ہر فرد کو چاہیے کہ وہ فاؤنڈیشن کی ممبرشپ حاصل کرے اور علاقے کے مسائل کے حل میں فعال کردار ادا کرے۔
