فوجی فرٹیلائزر کمپنی(ایف ایف سی) نے کسانوں کی مالی معاونت کیلئے 4 مختلف بینکوں کے ساتھ اشتراک کیا ہے، جس کا مقصد زرعی ترقی اور مالی شمولیت کو فروغ دینا ہے۔ اس اقدام کے تحت کسانوں کو ایف ایف سی کے سونا سینٹرز کے ذریعے 5 لاکھ روپے تک کی بلا رکاوٹ مالی امداد فراہم کی جائے گی، جس سے وہ معیاری زرعی اجزاء خریدنے اور اپنی پیداوار میں اضافہ کرنے کے قابل ہوں گے۔اس تاریخی معاہدے کی دستاویزات کی تقریب اسلام آباد کے سیرینہ ہوٹل میں منعقد ہوئی، جس میں ایف ایف سی کے بورڈ کے چیئرمین لیفٹیننٹ جنرل انور علی حیدر (ر) اور ایف ایف سی کے ایم ڈی اور سی ای او، جناب جہانگیر پراچہ کے علاوہ بینک آف پنجاب کے صدر و سی ای او، جناب ظفر مسعود، بینک الفلاح کے صدر، جناب عاطف اسلم باجوہ ، عسکری بینک کے صدر و سی ای او، جناب ضیاء اعجاز اور فیسل بینک کے ہیڈ آف کمرشل بینکنگ، جناب الفت حسین ثاقب نے شرکت کی۔یہ شراکت داری پاکستان کی معیشت کے ستون، کسانوں، کو مالی معاونت فراہم کرنے کی اہمیت کو اجاگر کرتی ہے۔ شرکاء نے اس عزم کا اعادہ کیا کہ وہ مالی اداروں اور زرعی شعبے کے درمیان فرق کو کم کریں گے اور کسانوں کے لیے کریڈٹ کی سہولتوں کو زیادہ رسائی اور آسان بنائیں گے۔اس معاہدے کے تحت کسانوں کو آسان اور تیز مالی امداد فراہم کی جائے گی جس سے وہ زرعی اجناس کی پیداوار بڑھا سکیں گے اور اپنے شعبے میں مزید کامیاب ہو سکیں گے۔یہ تعاون زرعی مالیات میں ایک سنگ میل کی حیثیت رکھتا ہے اور ایف ایف سی کی کسانوں کے استحکام، مالی شمولیت اور پائیدار زرعی ترقی کے لیے مسلسل کاوشوں کو اجاگر کرتا ہے۔
