راولپنڈی (مصطفی پرویز سے) راولپنڈی کے علاقے شکریال اور گردونواح میں آوارہ کتوں کی تعداد میں خطرناک حد تک اضافہ ہو چکا ہے، جس سے شہریوں کو شدید مشکلات کا سامنا ہے۔ دن ہو یا رات، گلیوں اور سڑکوں پر گھومنے والے آوارہ کتوں کے جھنڈ شہریوں کے لیے خوف کا باعث بن رہے ہیں۔ خاص طور پر بچوں، خواتین اور بزرگوں کے لیے باہر نکلنا دشوار ہو گیا ہے، جبکہ کچھ شہری کتوں کے حملوں میں زخمی بھی ہو چکے ہیں۔علاقہ مکینوں کے مطابق، آوارہ کتوں کے حملوں کے باعث کئی افراد کو اسپتال جانا پڑا۔ کچھ دن پہلے ایک معصوم بچہ گلی میں کھیل رہا تھا جب آوارہ کتوں نے اس پر حملہ کر دیا، جس سے وہ شدید زخمی ہو گیا اور فوری طور پر اسپتال منتقل کرنا پڑا۔ اسی طرح دیگر مقامات پر بھی کئی شہری ان کتوں کا نشانہ بن چکے ہیں۔مقامی لوگوں کا کہنا ہے کہ انہوں نے کئی بار متعلقہ حکام کو شکایات درج کروائی ہیں، لیکن ابھی تک کوئی مؤثر کارروائی نہیں کی گئی۔ شہریوں نے احتجاج کرتے ہوئے کہا کہ اگر فوری اقدامات نہ کیے گئے تو کوئی بڑا سانحہ پیش آ سکتا ہے۔آوارہ کتوں کو مارنے کے حوالے سے لاہور ہائی کورٹ کے احکامات کی وجہ سے انتظامیہ براہ راست کارروائی نہیں کر پا رہی۔ عدالت نے ہدایت دی تھی کہ آوارہ کتوں کو ہلاک کرنے کے بجائے ان کی ویکسینیشن اور محفوظ مقامات پر منتقلی کے اقدامات کیے جائیں، مگر اب تک کوئی مؤثر منصوبہ بندی سامنے نہیں آئی۔علاقہ مکینوں نے اعلیٰ حکام سے مطالبہ کیا ہے کہ آوارہ کتوں کے مسئلے کا فوری اور مستقل حل نکالا جائے۔ شہریوں نے تجویز دی ہے کہ کتوں کی نس بندی، ویکسینیشن اور انہیں خصوصی پناہ گاہوں میں منتقل کرنے جیسے اقدامات کیے جائیں تاکہ عوام کی جان و مال کا تحفظ یقینی بنایا جا سکے۔اگر حکام نے بروقت کارروائی نہ کی تو شہریوں کو مزید مشکلات کا سامنا کرنا پڑ سکتا ہے، اور خدشہ ہے کہ آوارہ کتوں کے حملے مزید لوگوں کو زخمی کر سکتے ہیں۔
