چکلالہ کنٹونمنٹ بورڈ کا تجاوزات کیخلاف بھرپور آپریشن،متعدد دکانیں سربمہر،چار ٹرک سامان ضبط

راولپنڈی (عبدالرحمان سے) چکلالہ کنٹونمنٹ بورڈ نے تجاوزات کے خلاف کارروائی کرتے ہوئے مختلف علاقوں سے چار ٹرک سامان قبضے میں لے لیا جبکہ بغیر نقشہ تعمیر کی گئی متعدد دکانوں کو سربمہر کر دیا۔ ایگزیکٹو آفیسر چکلالہ کنٹونمنٹ بورڈ عارفین زبیر چوہدری کی خصوصی ہدایت پر شعبہ انفورسمنٹ کے انچارج رانا سرفراز نے عملے کے ہمراہ ڈھیری حسن آباد، ٹاہلی موہری، 22 نمبر چونگی اور دھمیال روڈ پر کارروائیاں کیں۔ آپریشن کے دوران بڑی تعداد میں ریڑھیاں، دکانوں کے باہر رکھے گئے ٹھیئے اور دیگر سامان اٹھا لیا گیا جبکہ سڑک پر رکھی گئی سبزیاں بھی عملے نے ہٹا دیں۔ عملے کا کہنا ہے کہ روزانہ کی بنیاد پر تجاوزات کے خلاف کارروائی کی جاتی ہے، ایک دن ریڑھی ہٹائی جاتی ہے تو اگلے ہی دن نئی ریڑھی آ موجود ہوتی ہے۔ انفورسمنٹ اسٹاف کے مطابق بغیر نقشہ تعمیر کردہ دکانوں کے خلاف بھی سخت کارروائی جاری ہے تاکہ متعلقہ مالکان سے کمپوزیشن فیسوں کی وصولی کو یقینی بنایا جا سکے۔