راولپنڈی کے بینظیر بھٹو اسپتال میں کانگو وائرس کے 2 مریض انتقال کرگئے۔راولپنڈی بھر میں شہریوں میں خوف و ہراس پھیل گیا۔
ہسپتال ذرائع کے مطابق تین مریض رواں ماہ اٹک سے لائے گئے تھے، جن میں سے 2 انتقال کر گئے ،جب کہ کانگو وائرس کا تیسرا مریض زیر علاج ہے۔ڈی ایم ایس بینظیر بھٹو اسپتال ڈاکٹر جنید نے نجی نیوز سےگفتگو میں بتایا کہ کانگو جان لیوا وائرس ہے اور اس سے بچاؤ کے امکانات صرف 10 فیصد ہیں،کانگو وائرس جانوروں سے انسان اور انسان سے انسان میں منتقل ہوتا ہے۔ڈاکٹر جنید کا کہنا تھا کہ مسوڑوں، ناک اور فضلے میں خون آنا اور تیز بخار کانگو وائرس کی علامات ہیں۔دوسری جانب ضلعی انتظامیہ اٹک نے اٹک سے دوسرے علاقوں کو مویشیوں کی منتقلی پر پابندی لگادی ہے۔انتظامیہ کی جانب سے جاری نوٹیفکیشن کے مطابق اٹک سے مویشیوں کی بین الاضلاعی اور بین الصوبائی منتقلی پر پابندی 7 روز کے لیے ہوگی۔ڈپٹی کمشنر کے مطابق عید الاضحیٰ کے پیش نظر مویشی منڈیوں کی کڑی نگرانی کی جائے گی۔اس کے علاوہ محکمہ ہیلتھ پنجاب نے 9 رکنی ڈاکٹروں کی خصوصی ٹیم اٹک بھیجنےکا فیصلہ کیا ہے، 9 رکنی ڈاکٹروں کی ٹیم کانگو کے پھیلنے کی وجوہات کا پتا لگائے گی اور کانگو سے متعلق محکمہ لائیو اسٹاک کے اقدامات کا بھی جائزہ لے گی
