معلومات تک رسائی ہر شہری کا بنیادی اور جمہوری حق ہے،معلومات کا آزادانہ بہاؤ شفافیت، جوابدہی اور اچھی حکمرانی کو فروغ دیتا ہے، صدر مملکت آصف علی زرداری
صدر مملکت آصف علی زرداری نے کہا ہے معلومات تک رسائی ہر شہری کا بنیادی اور جمہوری حق ہے،معلومات کا آزادانہ بہاؤ شفافیت، جوابدہی اور اچھی حکمرانی کو فروغ دیتا ہے۔اتوار کوایوان صدر کے پریس ونگ سے جاری بیان کے مطابق صدرِ مملکت آصف علی زرداری نے عالمی دن برائے معلومات تک رسائی کے موقع پر پیغام جاری کرتے ہوئے کہا غلط معلومات اور جعلی خبروں کے ذریعے سچ کو مسخ کیا جانا آج کے دور کا بڑا چیلنج ہے،جعلی خبروں کا پھیلاؤ قومی یکجہتی اور اداروں پر عوامی اعتماد کو نقصان پہنچاتا ہے،ذمہ دارانہ رپورٹنگ اور درست معلومات کی فراہمی جمہوری استحکام کے لیے ناگزیر ہے۔ صدر مملکت نے کہا کہ معلومات تک بروقت اور درست رسائی شہریوں کو بااختیار بناتی ہے،صدرِ مملکت نے عوام سے اپیل کی کہ سوشل میڈیا پر غیر مصدقہ معلومات کے پھیلاؤ سے گریز کیا جائے،باخبر معاشرہ ہی شفافیت، ترقی اور انصاف کی بنیاد رکھتا ہے،تمام ادارے معلومات تک رسائی کے نظام کو مزید مؤثر بنائیں۔
