جان لیوا کھیل برداشت نہیں! ایس پی پری گل ترین کی ہدایت پر تھانہ کھنہ پولیس نے ون ویلنگ کرنے والوں کو گرفتار کر لیا
اسلام آباد (احمد ضمیر سے) ایس پی سواں زون پری گل ترین کی خصوصی ہدایات پر تھانہ کھنہ پولیس نے کارروائی کرتے ہوئے ون ویلنگ میں ملوث تین ملزمان کو گرفتار کر لیا، جن میں ایک لڑکی بھی شامل ہے۔ پولیس نے ملزمان کے خلاف مقدمہ درج کر کے قانونی کارروائی کا آغاز کر دیا۔ گرفتار ملزمان شہر کی سڑکوں پر خطرناک کرتب دکھا رہے تھے، جو نہ صرف ان کی اپنی جان کے لیے خطرہ تھا بلکہ دیگر شہریوں کے لیے بھی نقصان دہ ثابت ہو سکتا تھا۔یہ پہلا موقع نہیں کہ ایس پی پری گل ترین کی قیادت میں ون ویلنگ کے خلاف ایکشن لیا گیا ہو۔ اس سے قبل بھی ان کی خصوصی ہدایات پر مختلف کارروائیوں میں کئی ملزمان کو گرفتار کیا جا چکا ہے۔ چند روز قبل بھی پولیس نے ان کی ہدایات پر عمل کرتے ہوئے ون ویلنگ میں ملوث متعدد افراد کو گرفتار کیا تھا، جن کے خلاف قانونی کارروائی کی گئی تھی۔ پولیس کا کہنا ہے کہ اسلام آباد میں ون ویلنگ کے خلاف زیرو ٹالرینس پالیسی اپنائی جا رہی ہے اور ایسے غیر قانونی اقدامات میں ملوث افراد کے خلاف سخت کارروائی کی جائے گی۔
ایس پی پری گل ترین نے اپنے بیان میں کہا کہ ون ویلنگ ایک جان لیوا عمل ہے، جو کئی قیمتی جانیں لے چکا ہے۔ پولیس کی یہ مہم شہریوں کی حفاظت کے لیے جاری رہے گی اور والدین کو بھی چاہیے کہ وہ اپنے بچوں کی سرگرمیوں پر نظر رکھیں اور انہیں اس خطرناک رجحان سے دور رکھیں۔ انہوں نے مزید کہا کہ ٹریفک قوانین کی خلاف ورزی کسی صورت برداشت نہیں کی جائے گی
اور ون ویلنگ یا دیگر غیر قانونی کرتب دکھانے والوں کے خلاف سخت قانونی کارروائی کی جائے گی۔تھانہ کھنہ پولیس کی جانب سے ون ویلنگ کے خلاف مسلسل کارروائیاں جاری ہیں اور حکام نے واضح کیا ہے کہ جو بھی قانون کی خلاف ورزی کرے گا، اس کے خلاف سخت ایکشن لیا جائے گا۔ پولیس نے شہریوں سے اپیل کی ہے کہ وہ ٹریفک قوانین کی پاسداری کریں اور ون ویلنگ یا دیگر خطرناک سرگرمیوں کی اطلاع فوری طور پر متعلقہ حکام کو دیں تاکہ کسی بھی ممکنہ حادثے سے بچا جا سکے۔ ایس پی پری گل ترین کی قیادت میں یہ مہم مستقبل میں بھی جاری رہے گی تاکہ سڑکوں کو محفوظ بنایا جا سکے۔
